Vendimi i qeverisë për mbylljen e TikTok-ut ka pasur efektin e kundërt tek shqiptarët, duke nxitur një rritje të ndjeshme të kohës së qëndrimit në këtë platformë. Brenda pesë ditëve nga shpallja e bllokimit, numri i përdoruesve aktivë në TikTok është trefishuar, duke e bërë atë edhe më të popullarizuar.

Sipas ekspertëve të IT, dëshira për të pasur akses në këtë rrjet social është rritur jo vetëm te përdoruesit e rregullt, por edhe te ata që më parë nuk kishin një llogari. Kjo ka çuar në një rritje masive të shkarkimeve të aplikacioneve VPN, të cilat mundësojnë hyrjen në TikTok pavarësisht kufizimeve.

Eksperti i IT, Tomi Kallaxha, duke folur për Top Channel, theksoi se: “Duke qenë se është folur kaq shumë për këto VPN, njerëzit janë intriguar dhe kanë kërkuar mënyra për të aksesuar TikTok-un, i cili është bllokuar nga kompanitë telefonike. Në top dhjetë aplikacionet më të shkarkuara aktualisht, gjashtë prej tyre janë VPN, ndërsa TikTok mban vendin e dhjetë. Vetëm gjatë muajit mars, numri i përdoruesve është rritur me 60 deri në 80 mijë.”

Megjithatë, përdorimi i telefonave nuk është i kufizuar vetëm tek TikTok. Shqiptarët kanë shfaqur interes edhe për edukimin, sportin, bastet online të palejuara dhe serialet televizive. “Një fjalë kyçe shumë interesante që është vënë re në kërkime është se vajzat po kërkojnë informacion mbi profesionet më të mira në teknologjinë e informacionit. Gjithashtu, është rritur shkarkimi i serialit ‘Adoleshenca’, ndërsa futbolli dhe bastet online vazhdojnë të jenë në krye të preferencave,” shtoi Kallaxha.

Edhe pse ekspertët e IT paralajmërojnë se përdorimi i VPN mund të jetë i rrezikshëm dhe të dhënat e përdoruesve mund të hakerohen apo keqpërdoren, kjo nuk ka ndikuar në vendosmërinë e shqiptarëve për të vazhduar përdorimin e TikTok. Argëtimi dhe dëshira për të qenë të lidhur me rrjetin social duket se ka triumfuar mbi shqetësimet për sigurinë kibernetike.