Mirëmbrëma dhe një përshëndetje të përzemërt ju, të gjithë demokrateve dhe demokratëve, njishave të Shqipërisë.

Në çdo interpretim, nga lashtësia gjer në ditët e sotme, njishi del supernumri, supernjeriu, superfenomeni.
Numri i diellit, numri i bashkimit të jetës, të tjerat po ia lëmë letërsisë, mitologjisë.

Duhet të falënderoj shumë ju për punën që keni bërë dhe po bëni, të falënderoj demokratet, demokratët për angazhimin e tyre të fuqishëm në këtë betejë jashtëzakonisht të rëndësishme për të fituar zemrat dhe mendjet e qytetarëve shqiptarë, për ndërgjegjësimin e tyre në rëndësinë vendimtare të 11 majit.
Kjo klimë optimizmi është një terren do të thosha shumë i favorshëm në mënyrë që oferta jonë, ofertë absolutisht reale në çdo premtim të sajin, të përqafohet, të bëhet pjesë e ndërgjegjes së qytetarëve shqiptarë, mjet i tyre në këtë betejë.

Sot, në mbarë Shqipërinë, rivalizojnë propaganda e mashtrimeve me premtime të vërteta, me një projekt real që Shqipëria nuk e ka njohur kurrë më parë.

Ky projekt i Shqipërisë Madhështore ka dimensionin e tij ndër më kryesorët realitetin. Ky është një projekt i cili në çdo zotim të tij është 100 përqind i realizueshëm.

Ky projekt paraqitet para shqiptarëve nga misionarë të vërtetë.

Kandidatët tanë për deputet janë në një mision së bashku me stafet e tyre, së bashku me demokratët për të ndërgjegjësuar çdo qytetar për rëndësinë e madhe që ka ndryshimi me 11 maj për fuqinë e madhe transformuese që ka ky projekt.

E them edhe njëherë, projekt që nuk është paraqitur kurrë më parë në këto përmasa.
Të tjerat kanë qenë vegime të tij krahasuar me këtë të sotmin.

Të mëparshmet janë vetëm një trashëgimi, janë një eksperiencë që na shërben për këtë që kemi projektuar.
Dhe është programi që ka pasur mbështetjen dhe ndihmën e madhe të dy fondacioneve më prestigjioze të konservatorizmit në botë, fondacionit Heritage dhe fondacionit Adenauer.
Pra, ne kemi një avantazh të madh në këto zgjedhje sepse ne shkojmë me një projekt shumë të qartë, me një ëndërr dite shumë të bukur për Shqipërinë dhe shqiptarët.

Natyrisht kjo kërkon takimet më intensive që keni zhvilluar në jetën tuaj.
Më të shumta tuajat dhe të shtabeve tuaj, të bashkëpunëtorëve tuaj me qytetarët.
Në këtë garë, vetëkuptohet çdo kandidat do kërkojë votën dhe kjo është normale.
Por të gjithë kandidatët kanë një detyrim madhor, një mision madhor, paraqitjen e projektit.
Dhe mbi bazën e kësaj paraqitje, kërkesën e tyre për votimin për PD dhe Aleancën për Shqipërinë Madhështore si kushti i të gjitha kushteve që ky projekt të realizohet.

ZYRA E MEDIAS DHE KOMUNIKIMIT, PARTIA DEMOKRATIKE