Gjykata e Posaçme ka lenë në burg tre të arrestuarit dhe të akuzuarit për ekzekutimin e Fatbardh Licit.

Dy prej tyre u sollën nga qelitë, konkretisht Behar Bajri dhe Astmer Bilali, ndërsa Safet Bajri, i konsideruar si ‘truri’ i grupit kriminal, nga Blloku i Sigurisë.

Këta të tre do të përballeshin sot në Gjykatë me akuzat dhe me masën ‘arrest me burg’ dhënë më herët nga GJKKO.

HETIMET

Ndonëse Prokuroria në njoftimin për zbardhjen e ngjarjes së 10 gushtit të 7 vjetëve më parë, u tregua e kujdesshme në lidhje me autorët, duke mos harruar prezumimin e pafajësisë, në njoftim konkretizohet edhe shkaku i vrasjes së Fatbardh Licit; për hakmarrje ndaj vrasjes së mikut të Bajrajve, Boran Bërçana dhe partneres së tij. Por SPAK, që rimerr në dorë sërish dosjen e bandave të Shkodrës, pas masakrës së Dobraçit të fundtetorit të vitit të shkuar, ka mbajtur në pranga edhe dy të rinj, të cilët konsiderohen si ‘ushtarët’ e Bajrajve. Madje Safet Bajri nuk e mohoi as publikisht në daljen në media njohjen me dy të rinjtë, Samuel Troshani dhe Izmir Sakica, të cilët u vetëdorëzuan për një rrahje në Shkodër, por që, në fakt, ndaj tyre u ngrit një akuzë e rëndë; ata kishin qenë në makinat e blinduara në Rranza të Bushatit kur shkuan të vrasin familjen Prendi, ngjarje e ndodhur gushtin e 2024-s.

Dy djemtë, përveç ngjarjes së Bushatit, ku sipas SPAK kanë vepruar në bashkëpunim edhe me persona të tjerë, emrat e të cilëve ende nuk janë bërë publik, janë të dyshuarit kryesor për pjesëmarrje në atentatin që përgjaku Dobraçin, ku u qëllua mbi Hamza Licin dhe Arlind Bushatin, të cilët u masakruan në makinën e tyre. Nga të shtënat dhe devijimi i mjetit të viktimave, humbën jetën edhe çifti Basha, të cilët po kalonin atë moment në vendin ku i ishte ngritur pritë mjetit të të rinjve. Sakica dhe Troshani janë lënë në arrest me burg për hetimet e tjera, ndërkohë që RENEA në të gjitha ‘vizitat’ e saj në Shkodër, pikë referimi të kontrollit ka pasur shtëpitë e Bajrajve dhe të Bilalëve, ndonëse SPAK nuk ngriti asnjë akuzë zyrtare në lidhje me masakrën e Dobraçit, të paktën deri në këtë fazë të hetimit.