“Zjerm”, kënga me të cilën do të përfaqësohet Shqipëria në Eurovizion ka marrë shumë vëmendje, komente pozitive dhe shikime në rrjetet sociale. Kënga ka thyer rekord klikimesh, teksa brenda 48 orësh nga publikimi i videoklipit, kaloi 300 mijë shikime. Në një intervistë për emisionin “Mes Nesh”, Beatriçe Gjergji dhe Kol Laca shprehen të lumtur dhe të emocionuar nga ky sukses.

“Jam shumë e emocionuar. Kam parë disa komente shumë të bukur për ne dhe punën që është bërë, për elegancën që është prezantuar Shqipëria dhe domethënien e këngës e po ashtu edhe domethënien e videos. Jam shumë e lumtur”, u shpreh Beatriçe.

“Jemi shumë të gëzuar dhe të angazhuar me punë për përgatitjet e Eurovizion. Jemi shumë të gëzuar për videoklipin. Është kuptuar mesazhi i këngës, njerëzit janë duke e parë me sytë e duhur, që nuk është një videoklip me disa imazhe por ka një koncept mbrapa që është njësoj si edhe i këngës”, tha Kola.

Por si do të jetë performanca në skenën e madhe të Eurovizion? Beatriçe tha se vijon ende puna, duke shpresuar për një performancë të veçantë.

“Detajet nuk i kemi as ne, domethënë është një agjenci kreative nga Londra që po krijojnë skenën tonë dhe besojmë se do krijojnë diçka të bukur dhe të veçantë. Performanca ka për të qenë pothuajse e njëjtë, personazhet po ashtu, vetëm unë dhe Kola. Janë disa gjëra që po i mendojmë, por të gjitha detajet nuk i kemi as ne”, tregoi Beatriçe.

E pyetur nëse do të bëjë në skenë lëvizjet e saj unike, që janë bërë kaq të pëlqyera dhe virale në rrjetet sociale, Beatriçe tha me nota humori: “Është e domosdoshme, unë nuk di të mësoj edhe ndonjë gjë tjetër, vetëm atë”.

/rtsh.al/