Projekti për ndërtimin e urës së re mbi lumin Bunë mes Shqipërisë dhe Malit të Zi ka hyrë në një fazë të avancuar, duke iu afruar gjithnjë e më shumë zbatimit në terren. Ura, e cila do të lidhë Velipojën me Plazhin e Madh të Ulqinit, synon të përmirësojë lidhjet ndërkufitare dhe të krijojë mundësi të reja për zhvillimin ekonomik, turistik dhe kulturor të zonës.

Objekti do të jetë 380 metra i gjatë, me tre harqe dhe i përshtatur për qarkullimin e automjeteve, biçikletave dhe këmbësorëve. Ai pritet të shkurtojë ndjeshëm kohën e udhëtimit midis dy destinacioneve turistike dhe të lehtësojë lëvizjen gjatë sezonit veror.

Projekti është hartuar nga pala shqiptare, nëpërmjet Fondit Shqiptar të Zhvillimit, dhe pritet të kushtojë rreth 20 milionë euro. Kostot do të ndahen në mënyrë të barabartë mes dy vendeve, përfshirë ndërtimin, mbikëqyrjen dhe shërbimet teknike.

Një tjetër hap formal drejt realizimit të urës është përmbyllja e procesit të ratifikimit të marrëveshjes nga Parlamenti i Malit të Zi, pasi kjo ishte miratuar më herët edhe nga Kuvendi i Shqipërisë dhe botuar në Fletoren Zyrtare. Marrëveshja për ndërtimin e urës u nënshkrua në Podgoricë më 27 shkurt 2023 nga kryeministrat e dy vendeve, Dritan Abazoviç dhe Edi Rama.