Kryetari i Partisë Demokratike, Sali Berisha u shpreh sot se “paketa e dhembshurisë e paraqitur para 15 muajsh nga PD në komisionet parlamentare u refuzua në mënyrë kategorike”.

“Forca tjetër politike, siç e shihni, pa program u detyrua të kopjojë, pasi e pa që shqiptarët nuk e pranuan më dhe u kthyen duke kopjuar programin tonë se nuk ka çfarë të thotë”, tha Berisha gjatë një konference për shtyp.

Sipas tij, “Edi Rama ka 62 premtime të pa mbajtura dhe kopjimi i programit të PD-së erdhi pas rënies dramatike të pikëve të tij në sondazhe”.

“Shqiptarët janë të interesuar, jetësisht, për pensionet, rrogat, për luftën ndaj korrupsionit, pra për mirëqenien e tyre. Para 15 muajsh kam dërguar në parlament ligjin për minimumin jetik, me qëllim që ky ligj të miratohej dhe të mos merrte karakter politik. Ata e mbajtën ligjin dhe betejë pas beteje, Rama e hodhi poshtë dhe nuk pranoi kurrë ta votonte. Ligji sillte mes tjerash, në mënyrë automatike pension minimal 200 euro”, tha Berisha, ndërsa shtoi se deputetët e PD-së janë gati ta votojnë që nesër këtë ligj.

Duke folur për programin elektoral të PD-së, Berisha theksoi se çdo vendim dhe ligj i hartuar mbi korrupsionin do anulohet.

“Korporata shqiptare e investimeve, piramida më e madhe e grabitjes së pronave të shqiptarëve, do shkrihet menjëherë. Dhe ajo që merr përsipër që me një vendim qeverie, në kundërshtim flagrant me Kushtetutën, të plaçkisë pronat e shqiptarëve, absolutisht do dënohet me rreptësinë më të madhe”, shtoi ai.

Po ashtu Berisha tha se vepra më e rëndë kriminale pas vrasjes, do të konsiderohet krimi elektoral.

“Me zero tolerancë ndaj korrupsionit, zero tolerancë ndaj krimit. Dhe ata të harrojnë se mund të lajë kush para në ndërtim”, shtoi ai.