Detaje të reja janë zbardhur në lidhje me vrasjen e 20-vjeçarit Pavlin Preka në fshatin “Guci e Re”, Shkodër. Fillimisht u raportua se viktima ishte vrarë me thikë, por policia konfirmoi se i riu është ekzekutuar me armë zjarri. Gjithashtu ekspertiza ka zbuluar se Preka është qëlluar me një plumb në gjoks nga një pistoletë.

Ndërkohë në vendngjarje është gjetur dhe sekuestruar një gëzhojë, e cila do të shërbejë për analizat balistike dhe identifikimin e armës së krimit. Po ashtu trupi i pajetë i Pavlin Prekës u gjet nga xhaxhi i tij në oborrin e shtëpisë, ndërsa autori i krimit mbetet ende i paidentifikuar.

Grupet hetimore, të drejtuara nga Prokuroria e Shkodrës, po vijojnë punën për zbardhjen e motiveve dhe identifikimin e autorit të vrasjes. Policia ka ngritur pika kontrolli në zonë dhe po analizon kamerat e sigurisë për të hedhur dritë mbi lëvizjet e dyshimta në momentin e ngjarjes.