Gazetari Eni Ferhati ka paraljmëruar arrestime të reja nga SPAK duke filluar nga janari i vitit të ardhshëm. I ftuar në emisionin “Now” me Erla Mëhillin, Ferhati tregoi se Struktura e Posaçme Kundër Korrupsionit dhe Krimit të Organizuar po zhvillon një sërë hetimesh të përqëndruara tek tenderat publikë.

Ndër të tjera ai tha se arrestimet do të vijnë dhe nga zbulimet e bisedave të inkriptuara nga aplikacionet e dominuara nga organizatat kriminale, Sky Ecc dhe Encro Chat, të cilat do të hapin dosje të reja penale.

“Ajo që më ka bërë përshtypje është dosja e fundit, ajo e organizatës kriminale të Suel Çelës, sa i takon mënyrës se si kjo organizatë e ushtronte influencën e saj në territor edhe sa i takon komunikime që më pas janë zbardhur nga njerëz të drejtësisë.

Ajo që mua më pëlqen në strategjinë e prokurorisë së Posaçme, janë hetimet që SPAK po u bën tenderave publik.

Abuzimi më i madh me fondet e taksapaguesve shqiptarë janë te tenderat dhe prokuroria e Posaçme një punë të mirë po e ushtron pikërisht te ankandet publike. Këtu kemi parë çudira nga më të ndryshme se si bëhet kopsitja e letrave për të favorizuar një kompani të caktuar. Kjo ka bërë që institucionet të jenë më të kujdesshme me ushtrimin e detyrave të tyre.

Unë besoj se në janar, me ardhjen e informacioneve të tjera nga Sky, ndërkohë keni edhe Matrix në horizont që nuk dihet nëse do të hetohet njësoj. Do kemi dosje të tjera penale. Ka ngjarje të tjera shumë të rënda të cilat janë marr tashmë nga SPAK, siç është edhe masakra e fundit e Dobraçit për të cilën janë lëshuar edhe disa masa sigurie”,-tha gazetari Eni Ferhati.

Post Views: 37