eetimes
Një natë e veçantë, plot emocione dhe kujtime, do të jetë mbrëmja e sotme në Festivalin e Këngës në Radio Televizionin Shqiptar. Nata e Nostalgjisë do të na rikthejë në kohët e shkuara, duke sjellë në skenë këngët që kanë bërë historinë e këtij festivali legjendar. Këngë që kanë shoqëruar vite të tëra, të cilat do të tingëllojnë ndryshe këtë natë, të interpretuara në duet nga artistët pjesëmarrës të Fest 63, për të na dhuruar një shpërthim emocionesh dhe tingujsh muzikorë.
Me poezinë “Mall” të ikonës së letërsisë shqiptare, Ismail Kadaresë, u bë hapja e Natës së Nostalgjisë në Festivalin e Këngës, duke emocionuar publikun. Aktori Viktor Zhusti e interpretoi atë me një ndjenjë të thellë, duke i dhënë jetë vargjeve të poetit, ndërsa notat e pianos të këngëtarit Redon Makashi shtuan magjinë e momentit. Ky interpretim riktheu nostalgjinë e një prej vepra më emblematike të letërsisë shqipe.
Në Fest 63, aktori i njohur I teatrit dhe kinemasë, Viktor Zhusti, ka treguar një episod se si arriti t’i shpëtojë ‘çarkut’ të Festivalit të 11, i cili hapi dhe siparin e një serie ndëshkimesh politike nga regjimi komunist ndaj artistëve në skenë dhe në teatër.
“Kam prezantuar Festivalin e 57-të të Këngës, i cili ishte plot atmosferë. Në vitin 1971 kam prezantuar edhe Festivalin e 10. Ishte një eksperiencë shumë e mirë. Doja të prezantoja edhe Festivalin e 11-së. Për pak i shpëtova ‘çarkut’. Kisha sugjerim nga pedagogu im Mihallaq Luarasi për Fest 10, por për Fest 11 më tha jo sepse kërkohej një prezantues më modern. Pas atij festivali pati ditë të errëta për artin”, tregoi Zhusti në skenën e Fest 63.
Kjo natë nuk është vetëm një koncert, por një udhëtim nëpër kujtime dhe histori. Do të nderohen poetët dhe tekstshkruesit që krijuan këngët që i kënduan “shpirtit shqiptar” për dekada të tëra: Jorgo Papingji, Agim Doci, Ismail Kadare, dhe shumë të tjerë, poezive të të cilëve u dha jetë përmes muzikës.
Do të rikthehen në skenë dhe aktorët që do i japin zë poezisë së kthyer në këngë si Luiza Xhuvani, Viktor Zhusti, Alfred Trebicka dhe Elia Zaharia, për të na kujtuar se muzika është një poezi e pashuar.
Një tjetër moment emocionues do të jetë rikthimi i Naim Krasniqit në Festivalin e Këngës pas shumë vitesh, ndërsa së bashku me publikun do të këndohen edhe këngët e Parashqevi Simakut, zëri i së cilës do të ringjallet përsëri për publikun, duke na bërë të ndiejmë çdo notë të saj me të njëjtën pasion dhe dashuri.
Nata e Nostalgjisë është një udhëtim në kohë, një mundësi për të shijuar pasurinë e trashëgimisë sonë kulturore. Këtë mbrëmje vota e jurisë do të përcaktojë edhe 15 finalistët, të cilët do të performojnë në natën e finale të Fest 63. Kryetarja e jurisë është artistja e njohur Zana Çela dhe trupën e jurisë e plotësojnë: Alma Bektashi, Ylljet Aliçka, Merita Rexha Tërshana, Florent Boshnjaku, Jonida Maliqi dhe Ramona Tulluman.
/rtsh.al/
