Papa Françesku ka rrëfyer se i kishte shpëtuar një sulmi të dyfishtë vetëvrasës gjatë një vizite në Irak tre vjet më parë, pasi tentativat për vrasjen e tij u penguan nga inteligjenca britanike dhe policia irakiane.

Papa e bëri të ditur këtë në autobiografinë e tij të ardhshme, Spera (Shpresa), fragmente të së cilës u botuan në “Corriere della Sera” të martën, në ditëlindjen e 88-të të tij, raportojnë mediat e huaja.

88-vjeçari ka thënë se ai ishte këshilluar fuqimisht të mos bënte udhëtimin në Irak në mars të vitit 2021, i pari nga një Papë atje, sepse pandemia me Covid-19 ishte ende e përhapur teksa rreziqet e sigurisë ishin të larta, veçanërisht në Mosul, qytetin verior të shkatërruar nga militantët e Shtetit Islamik.

Megjithatë, Papa ka thënë se ishte i vendosur të vazhdonte udhëtimin.

Në rrëfimin e tij të ngjarjeve thuhet se inteligjenca britanike informoi policinë irakiane për bombat e planifikuara sapo Papa Françesku mbërriti në Bagdad. Nga ana tjetër, policia irakiane informoi organin e sigurisë të Vatikanit.

Papa ka përshkruar se si një nga sulmuesit vetëvrasës ishte një grua që po shkonte drejt Mosulit për të hedhur veten në erë gjatë vizitës së tij. Një kamion gjithashtu “ishte nisur me shpejtësi atje me të njëjtin qëllim”, ka bërë të ditur ai.