eetimes
Një ngjarje të veçantë organizuar nga Animals Need Me, më 4 Tetor, e cila përkon me Ditën Ndërkombëtare të të Drejtave të Kafshëve, u mbajt një seminar për “Avancimin e të Drejtave të Kafshëve në Shqipëri – Bashkëpunimi Ndër-Institucional dhe Përvoja Zvicerane”. Ky seminar u zhvillua me pjesëmarrjen e shumë ekspertëve dhe zyrtarëve të fushës, duke sjellë në vëmendje nevojën urgjente për përmirësimin e kushteve dhe trajtimit të kafshëve në vend.
Seminari u hap me fjalën e themelueses dhe Drejtueses së organizatës Animals Need Me, Oli Pero.
Ndër temat kyçe të diskutuara ishte rëndësia e respektimit të ligjeve për mbrojtjen e kafshëve, ku Drejtuesi i Shkollës së Magjistraturës, Z. Arben Rakipi, theksoi rëndësinë e trajtimit human të kafshëve dhe faktin se Kodi Penal përmban një seksion të dedikuar për këtë çështje. Ai gjithashtu propozoi që të drejtat e kafshëve të përfshihen në programin mësimor të shkollës së magjistraturës.
Sajmir Shehu nga Four Paws mbajti një prezantim të thelluar mbi problematikat e kafshëve të faunës dhe nevojën për përmirësimin e kujdesit ndaj kafshëve në Shqipëri, duke tërhequr vëmendjen mbi nevojën për politika më të qarta dhe të zbatueshme në nivel lokal dhe kombëtar.
Gjatë seminarit, Av. Valbona Pecaj solli në vëmendje statistikat alarmante të abuzimeve ndaj kafshëve dhe sfidat me të cilat përballen në Shqipëri. Nga ana tjetër, Bianca Corner nga Tier im Recht paraqiti një pasqyrë të zbatimit të ligjit për mirëqenien e kafshëve në Zvicër, si model që mund të ndiqet.
Një nga momentet më të veçanta të seminarit ishte seanca e ushtrimeve me raste reale, ku pjesëmarrësit shfaqën një interes të lartë dhe ndërvepruan aktivisht, duke dëshmuar angazhimin e tyre dhe vullnetin për të mësuar më shumë rreth kësaj teme. Po ashtu, paneli i mjekëve veterinerë u përball me një sërë pyetjesh të thella, që reflektuan një interesim dhe kureshtje për të zgjeruar njohuritë mbi kujdesin dhe trajtimin e kafshëve.
Seminari përfundoi me një seancë rekomandimesh nga Dr. iur. Gieri Bolliger nga Tier im Recht, i cili paraqiti një sërë rekomandimesh për përmirësimin e ligjeve dhe praktikave të mirëqenies së kafshëve në Shqipëri, duke theksuar rëndësinë e edukimit dhe trajnimit të gjithëpërfshirës për profesionistët ligjorë dhe ata të kujdesit ndaj kafshëve.
Ky seminar shënoi një hap të rëndësishëm drejt avancimit dhe forcimit të të drejtave të kafshëve në Shqipëri, duke sjellë së bashku mendimtarë dhe vendimmarrës për të hartuar një rrugë më të mirë përpara në këtë fushë të rëndësishme.
