Ish-kryetari i Partisë Demokratike Lulzim Basha ka bërë thirrje për protesta masive në Shqipëri. Gjatë një takimi me të rinjtë në Shkodër, Basha ka deklaruar se nëse nuk mbushen sheshet, atëherë Shqipëria do të vazhdojë të lëngojë. Po ashtu Basha ka deklaruar se ky do të jetë fillimi i një reagimi rinor për të kërkuar qeverisje të mirë.

“Me heshtjen tuaj ka kumbuar një mesazh që ju e keni refuzuar këtë lloj politike. Pa u zemëruar ju dhe pa folur ju me zë të lartë, pa dalë me pankarta për t’i thënë jo të keqes dhe për t’u përballur me të, për të mbushur rrugët dhe sheshet, Shqipëria do të vazhdojë të lëngojë. Unë kam besim dhe shpresë që ky është vetëm fillimi i një reagimi rinor. Çfarë dinë ata që erdhën të kërkojnë votën këtu për dëshirat, ëndrrat dhe nevojat tuaja? Asgjë! Sepse janë të vjetër. Se u bë kohë që po merren vetëm me veten e tyre dhe me njëri tjetrin. Unë kam një plan si mund të përballem me këtë nga pikëpamja politike. Se nga pikëpamja njerëzore e thashë. Por nga pikëpamja politike, gjëja e parë që duhet të konstatojmë është se rinia është e mërzitur dhe nuk merr pjesë në votime. Rinia duhet të marrë pjesë në procesin politik”, tha Basha.

Post Views: 218