Opozita kërkoi dorëheqjen e Kryeministrit Rama, në një protestë paqësore të zhvilluar para selisë së qeverisë, pasi e akuzon ate së është i përfshirë në skandalin e dosjes së ish-zyrtarit të FBI, Charles McGonigal.

Protesta nisi nga selia e Partisë Demokratike, ndërsa me grumbullimin në bulevardin “Dëshmorët e Kombit”, përfaqësues dhe krerët e opozitës u ngjitën në podium për të mbajtur fjalime.

Aleati i demokratëve Ilir Meta, pasi rreshtoi një sërë akuzash për Kryeministrin, deklaroi se vendi i tij është në qeli për korrupsion, abuzime me detyrën dhe lidhje me krimin e organizuar.

“Edi Rama është tashmë vetëm një subjekt plotësisht i merituar për drejtësinë për veprimet e tij shumë të rënda minuese kundër kushtetutës.”

Sali Berisha i cili u ngjit i fundit në podium, deklaron se çështja McGonigal është dëshmi se shpallja e tij non grata u lobua nga Edi Rama.

“Ish-kryetari i opozitës u morr peng nga Edi Rama. Sali Berisha pa asnjë fakt, dokument, provë nga kjo mafie, ky lobim u sanksionua. U bë gjithçka për të caktuar kryetarin e opozitës.”

Kreu i demokratëve i kërkon senatit amerikan dhe Parlamentit europian të hetojnë Edi Ramën.

“Le të hetojnë veprimtarinë e George Soros në Shqipëri se si ky multimiliarderë bëri gjithçka për të ngritur në piedestal një kryekorruptor që sot moralisht është i varur në shtyllën e turpit të Shqipërisë, Europës, SHBA, mbarëbotës.”

Berisha thotë se ka dijeni se vila e Kryeministrit në Surrel ka armatime të rënda.

“Në Surrel ke futur në tunele, tanket dhe autoblindat e ushtrisë. Ato tanke largoi nga Surreli, gjysmën e tyre çoi në Ukrainë po s’të lë Putin dhe Vuçiç.”

Largimin e Ramës e sheh si mundësinë e vetme për shpetimin e vendit nga varfëria e shkaktuar nga korrupsioni sipas tij.

“Jep dorëheqjen, largohu, nisu aty ku e ke vendin. Te shtylla e turpit në banesën e tradhëtarëve.”

Premtoi ndryshime kur demokratët të vijnë në pushtet, me vendime e ligje që u vijnë në ndihmë qytetarëve.

“PD do amnistojë çdo detyrim që krijohet në këtë periudhë që Shqipëria ka në krye të qeverisë një person që ndodhet në hetim ndërkombëtar.”

Protestën e sotme e cilëson vetëm nisjen e revolucionit, dhe premton mosbindje civile dhe vijimin e protestave menjëherë në fillimin e javës së ardhshme.

“Revolucioni na fton të gjithë para parlamentit.”

Por fjala e tij nuk ishte fundi i protestës së kësaj të shtune. Disa nga protestuesit hodhën flakadanë pranë hyrjes së Kryeministrisë së rrethuar nga një gardh efektivësh të policisë, të cilët nuk ndërhynë.

Mbështetësit e opozitës, të udhëhequr nga Berisha, marshuan drejt Ministrisë së Brendshme, Bashkisë së Tiranës, Partisë Socialiste dhe Parlamentit.

“Ky vendin e ka në burg, burg dhe vetëm në burg.”

Protesta u mbyll në mënyrë paqësore me premtimin për të vijuar pasditen e të hënës, në orën 17:00, kur Kuvendi do të mblidhet në seancë plenare.

Tv Klan

Post Views: 220