Ndonëse nuk kishte një koncert apo premierë, në Shkodër kishte emocione pasi rinisi nga puna pas një mungese prej 32 vitesh Orkestra Simfonike e Shkodrës, teksa mbrëmë në ambientet e Qendrës Kulturore “Kujtim Alija” do të ekzekutoheshin edhe notat e para muzikore pas kësaj ndërprerje të gjatë.

Dirigjenti, Jetmir Barbullushi shprehet se ekzistenca e kësaj orkestre do të ketë impakt në edukimin e brezave të rinj me muzikën e vërtetë.

Një moment historik dhe vazhdim i një tradite që zë fill nga Martin Gjoka e më vonë Prenkë Jakova e quajtën rifillimin e punës së kësaj orkestre dy muzikantët Gjon Shllaku dhe Markelian Kapidani.

Nisjen e punës së Orkestrës Simfonike të Shkodrës e përshëndeti edhe kryetari i bashkisë, Bardh Spahia teksa garantoi mbështetjen e tij dhe të institucionit që drejton.

Kjo orkestër pritet të ketë premierën e parë para publikut shkodran në muajin mars.

Orkestra Simfonike e Shkodrës do të ketë në përbërjen e saj 45 instrumentistë që nga ata të përvojës e deri tek më të rinjtë ndërsa me rithemelimin e saj plotësohet edhe kuadri i plotë i Filarmonisë së Shkodrës duke përfshirë instrumentistët solistë, korin polifonik dhe solistët lirikë dhe ata modern, formacionin e Orkestrës Frymore si dhe formacionin e muzikës moderne me këngëtarët përkatës duke ndikuar kështu në rigjallërimin e jetës artistike në qytet.

Post Views: 369