eetimes
Presidenti Ilir Meta ka apeluar për të marrë të gjithë masat mbrojtëse për bluzat e bardha që janë në vijën e parë të frontin të përballjes së koronavirusit. Duke shfrytëzuar ditën ndërkombëtare të sigurisë dhe shëndetit në punë, kreu i shtetit ka theksuar me forcë se duhet të ti sigurohen kushtet atyre që janë në vijën e parë të Covid-19. Në të njëjtën kohë presidenti apelon që shteti ti japë ndihmë biznesit fason në këto ditë të vështira.
Mesazhi i plotë
Me rastin e Ditës Ndërkombëtare të Sigurisë dhe Shëndetit në Punë, përsëris thirrjen drejtuar Qeverisë për të garantuar me përgjegjësi dhe transparencë të gjitha masat mbrojtëse për mjekët, infermierët dhe personelin e tyre mbështetës, të cilët rrezikojnë shëndetin e tyre për të mbrojtur shëndetin e të gjithëve ne.
Me shqetësim kam ndjekur këto ditë edhe situatën në sektorin fason, ku janë shfaqur një sërë problematikash, që mund të ishin shmangur nëse masat kufizuese, higjiena dhe distancimi social në ambientet e punës do të ishin respektuar. Ndërkohë që ky sektor kryesor punëdhënës ka nevojë për një përkrahje më konkrete për të mbijetuar.
Garantimi i kushteve të sigurta dhe të shëndetshme të punës në çdo sektor, veçanërisht të kujtdo që është në vijën e parë kundër COVID-19, janë të domosdoshme për menaxhimin e pandemisë dhe rikthimin sa më shpejt në normalitet. Jeta, shëndeti dhe mirëqenia e qytetarëve janë të parat!
