Dom Gjergj Meta deklaroi në studion e Pa Protokoll në Report Tv, se njerëzit nuk duhet të luajnë me ligjet e natyrës, duke iu referuar lajmeve të rreme në disa portale të cilat përhapën panik pas tërmetit të 26 Nëntorit. Ai tha se dora e Zotit ishte në këtë ngjarje, pasi njerëzit u solidarizuan menjëherë për të ndihmuar njëri-tjetrin.

“Tërmeti i takon sizmologëve. Ajo është diçka e natyrës. Zoti na ka dhënë arsyen që të ruhemi nga ligjet e natyrë. Gjithë problemi është i ekosistemit. Është njeriu që ka prerë pyjet, ka ndërtuar në vende dhe mënyrë të papërshtatshme. Zoti merret me zemrat e njerëzve. Dora e Zotit në të gjithë këtë ngjarje ishte nga të gjithë ato burra dhe gra që erdhën për të na ndihmuar. Aty unë them se ka edhe portale dashakeqe”, tha Dom Gjergj Meta.

Dom Gjergj Meta foli edhe për situatën në vend në prag të festave të Krishtlindjeve. Ai u ndal në disa çështje kryesore që prekin jetën e përditshme ndërsa ceku edhe besimin e njerëzve i cili sipas tij, sot nuk është në nivelin e viteve të mëparshme.

“Unë promovoj natyrë për të thënë që ka një natyrë të bukur, por ajo është prishur shumë. Tani janë tharë edhe lumenjtë. Unë e kam thënë fjalën time, kam mbështetur banorë në protesta. Ata kanë të drejtën e tyre. Unë jam nga ata që them se natyre nuk duhet të preket. Ajo që unë mendoj shumë është se ekzictenca e historisë dhe vlerave. Duhet një bashkërendim forcash mes pushteteve, OJF-ve. Ne kemi zona të mrekullueshme në të gjithë vendin. Kemi Lurën, është e jashtëzakonshme. Janë Malësitë e Dibrës, janë të jashtëzakonshme. Më ka rënë rasti të takoj njerëz që nuk janë katolikë dhe më kanë takuar, madje njëri prej tyre më ka falenderuar duke thënë se ke ngritur zërin edhe për ne. Sa i përket katolikëve, e kanë shumë më krenari të thonë se janë katolikë. Kjo përkon edhe me një katolicizëm shoqëror për shkak të përkatësisë fetare të familjes, por kjo nuk bën dallime. Në Mirditë frekuentimi i Kishës është shumë i ulët. Në një kohë të kaluar Kishe ishte e vetmja hapërsirë pas familjes, dasmës dhe mortit. Sot shihet për të kaluar kohën. Zemrën e njeriut nuk e ndryshon as kisha, as murgesha por vetëm Zoti. Prifti sado i mirë të jetë i kërkon njerëzit vetëm tek vetja e tij” u shpreh ai.