KESH shiti energji 4 herë më lirë se çmimi në bursë? Rama: Gënjeshtër për të helmuar popullin dhe nxitur urrejtjen ndaj qeverisë

Qeveria ka mohuar se KESH ka shitur energji elektrike më lirë sesa çmimi në bursë. Përgjigja ka ardhur nga vetë kryeministri Edi Rama i cili thekson se kjo është thjesht një gënjeshtër që po përdoret nga opozita dhe disa media për të nxitur urrejtjen ndaj qeverisë.

“Gënjehet pa të keq fare, sikur këndohet, bjeri t’i biem, një orkestër e tërë e injorancës dhe ligësisë, kanal më kanal portal më portal, shifra futja kot, fjalë rromapërtoma për të helmuar popullin e nxitur urrejtjen ndaj qeverisë! Deri në pikën që s’ka më asnjë logjikë”, shkruan Rama.
Shirat e dendur që kanë rënë prej mbrëmjes të së shtunës kanë përmirësuar situatën hidrike dhe KESH ka shitur energji elektrike. Kjo ka sjellë edhe reagimin e opozitës e cila akuzon qeverinë se nuk e ndërpret importin e energjisë. Sali Berisha tha dje nga Shkodra se mazhoranca po shet energji me çmim katër herë më të ulët se sa e blen për shkak të kontratave që kanë firmosur më parë.