LAJM I MIRE/ Klevis Gjeluci niset për kurim drejt Italisë në nje prej spitaleve të Romës

Klevis Gjeluci, i riu shkodran në koma nga 27 shtatori i këtij viti, nis “udhëtimin e shpresës”. Burime pranë familjes të të riut, bëjnë me dije për ShkodraWeb se i riu që aksidentua me mjetin e tij në Shkodër, është nisur drejt Italisë.

Fillimisht u mendua se udhëtimi do të kryhej me avion, ndërsa duke parë gjendjen e Klevisit, mjekët e një spitali privat në Tiranë, bashkë me familjen e 20 vjeçarit, vendosën që udhëtimi të kryhej me një ambulancë speciale të vënë në dispozicion nga spitali.

Ndërkohë, prindërit, nëna dhe babai i Klevis, janë tashmë në Romë ku presin djalin e tyre të mbërrijë në Itali përmes rrugës tokësore. Mësohet se i riu do të shtrohet në spitalin “Gemelli” të Romës, një nga më të mirët jo vetëm në Itali por edhe në Europë e botë.
Përmes rrjeteve sociale, u nis një fushatë për mbledhje fondesh për të mundësuar udhëtimin e kurimin e Klevisit në Itali. Në më pak se një javë, u arrit të mblidhej deri ditën e sotme mbi 300 mijë euro, ndërsa duhet edhe po kaq që Klevisi të rikthehet shëndoshë e mirë mes nesh.

Sot Klevisi nis një udhëtim, ndoshta më të vështirin jetës së tij, të familjes, miqve, shokëve e të njohurve. Por është një udhëtim shprese, i mbështetur jo vetëm nga bujaria e pashoqe e shqiptarëve anëkënd botës por edhe lutjeve pa fund për jetën e këtij të riu.

Mirardhsh shëndosh e mirë në Shkodër e Shqipëri Klevis! Fitoje këtë betejë të vështirë, fitoje për vete, për familjarët por edhe të gjithë ata shqiptarë që vazhdojnë të luten për ty!